Sawe និង Kejelcha ក្លាយជាអ្នករត់ម៉ារ៉ាតុងដំបូងប្រើពេលក្រោម ២ម៉ោង នៅ London
By Dany • 31 views
កំណត់ត្រារត់ម៉ារ៉ាតុងក្រោម ២ម៉ោង ត្រូវបានបំបែកជាផ្លូវការជាលើកដំបូង ក្នុងព្រឹត្តិការណ៍រត់ម៉ារ៉ាតុងអន្តរជាតិទីក្រុង London ឆ្នាំ ២០២៦ ដោយកីឡាករ Sabastian Sawe មកពីកេនយ៉ា និង Yomif Kejelcha មកពីអេត្យូពី។ អ្នកទាំងពីបានបង្កើតប្រវត្តិសាស្ត្រថ្មី ដោយក្លាយជាអត្តពលិកបុរសដំបូងគេដែលរត់បានក្រោម ២ម៉ោង ក្នុងការប្រកួតផ្លូវការ។
ក្នុងការប្រកួតនេះ Sawe បានឈ្នះចំណាត់ថ្នាក់លេខ១ ដោយប្រើរយះវេលា 1:59:30 ខណៈ Kejelcha ទទួលបានលេខ២ ជាមួយរយះវេលា 1:59:41 ដែលយឺតត្រឹមតែ ១១ វិនាទីប៉ុណ្ណោះ។ ជ័យជម្នះនេះមិនត្រឹមតែធ្វើឲ្យពិភពលោកភ្ញាក់ផ្អើលទេ ប៉ុន្តែថែមទាំងបំបែកកំណត់ត្រាពិភពលោកចាស់ផងដែរ។
កំណត់ត្រាចាស់ត្រូវបានកាន់កាប់ដោយ Kelvin Kiptum ជាមួយរយះវេលា 2:00:35 ក្នុងព្រឹត្តិការណ៍ Chicago Marathon ឆ្នាំ ២០២៣។ ជាអកុសល Kiptum បានស្លាប់ក្នុងគ្រោះថ្នាក់ចរាចរណ៍នៅឆ្នាំ ២០២៤ ក្នុងវ័យត្រឹម ២៤ ឆ្នាំ។
ការប្រកួតម៉ារ៉ាតុងទីក្រុង London ឆ្នាំនេះ មានអ្នកចូលរួមជិត ៦ម៉ឺននាក់ ហើយជាលើកដំបូងក្នុងប្រវត្តិសាស្ត្រ មានអត្តពលិកដល់ទៅ ២ នាក់ ដែលអាចរត់ក្រោម ២ម៉ោងក្នុងព្រឹត្តិការណ៍តែមួយ។ ចំណាត់ថ្នាក់លេខ៣ ទៅលើកីឡាករ Jacob Kiplimo មកពីអ៊ូហ្កង់ដា ជាមួយរយះវេលា 2:02:28។
គួររំលឹកថា កីឡាករ Eliud Kipchoge ក៏ធ្លាប់រត់ក្រោម ២ម៉ោងបានម្តងក្នុងឆ្នាំ ២០១៩ ជាមួយថិរវេលា 1:59:40 ប៉ុន្តែមិនត្រូវបានទទួលស្គាល់ជាផ្លូវការទេ ព្រោះមិនស្ថិតក្រោមលក្ខខណ្ឌប្រកួតស្តង់ដារ។
ផ្នែកនារី កីឡាការិនី Tigst Assefa បានបំបែកកំណត់ត្រាពិភពលោករបស់ខ្លួន ដោយរត់បានរយះវេលា 2:15:41 លឿនជាងកំណត់ត្រាចាស់របស់នាង។ ចំណាត់ថ្នាក់លេខ២ បានទៅលើ Hellen Obiri ជាមួយរយះវេលា 2:15:53 ខណៈ Joyciline Jepkosgei ទទួលបានលេខ៣ ជាមួយរយះវេលា 2:15:55។
ព្រឹត្តិការណ៍នេះត្រូវបានចាត់ទុកថាជាការប្រែក្លាយដ៏ធំមួយក្នុងប្រវត្តិសាស្ត្រកីឡារត់ម៉ារ៉ាតុងពិភពលោក។
