លោក Gianni Infantino បានបញ្ជាក់យ៉ាងច្បាស់ថា អ៊ីរ៉ង់នឹងចូលរួមព្រឹត្តិការណ៍ FIFA World Cup 2026 ហើយអ៊ីតាលីមិនអាចមកចូលជំនួសបាននោះទេ
By Dany • 51 views
ក្នុងបរិបទភាពតានតឹងនៅមជ្ឈិមបូព៌ា ទោះមានស្ថានការណ៍នយោបាយស្មុគស្មាញក៏ដោយ ក្រុមជម្រើសជាតិអ៊ីរ៉ង់នៅតែត្រូវបានគ្រោងឲ្យចូលរួមប្រកួតក្នុងពានរង្វាន់ FIFA World Cup 2026 ដែលរៀបចំនៅសហរដ្ឋអាមេរិក កាណាដា និងម៉ិកស៊ិក។
ក្នុងសន្និបាត FIFA នៅទីក្រុង Vancouver ប្រធាន FIFA លោក Gianni Infantino បានបញ្ជាក់យ៉ាងច្បាស់ថា អ៊ីរ៉ង់នឹងចូលរួមព្រឹត្តិការណ៍នេះ ហើយនឹងប្រកួតនៅលើទឹកដីសហរដ្ឋអាមេរិកដូចដែលបានគ្រោងទុក។
ការបញ្ជាក់នេះកើតឡើងក្រោយមានពាក្យចចាមអារាមថា អ៊ីរ៉ង់អាចត្រូវបានដកចេញពីការប្រកួត និងអ៊ីតាលីអាចចូលជំនួស។ ទោះយ៉ាងណា លោក Infantino បានបដិសេធយ៉ាងដាច់ខាត និងសង្កត់ថា គោលបំណងរបស់ FIFA គឺ “នាំមនុស្សមករួបរួមគ្នា មិនមែនបំបែកបំបាកគ្នាទេ”។
នៅក្រៅទីលាន ក៏មានបញ្ហាផងដែរ បន្ទាប់ពីមន្រ្តីអ៊ីរ៉ង់មួយចំនួនមិនអាចចូលប្រទេសកាណាដាបាន ទោះមានវីសាក៏ដោយ ដោយសារបញ្ហាសន្តិសុខ។ ប៉ុន្តែបញ្ហានេះមិនប៉ះពាល់ដល់ការចូលរួមរបស់ក្រុមជម្រើសជាតិឡើយ។
តាមការកំណត់ អ៊ីរ៉ង់នឹងស្ថិតនៅក្នុងពូល G ដែលត្រូវជួបជាមួយ New Zealand, Belgium និង Egypt នៅលើទឹកដីអាមេរិក។
សរុបមក ទោះមានសម្ពាធពីក្រៅក៏ដោយ FIFA នៅតែរក្សាទីតាំងដើម ដោយអ៊ីរ៉ង់នឹងចូលលេង World Cup 2026 ខណៈអ៊ីតាលីត្រូវបន្តនៅក្រៅព្រឹត្តិការណ៍នេះដដែល៕
