Enzo Fernandez ត្រូវបានឃើញនៅ Madrid បន្ទាប់ពី Chelsea ផ្តន្ទាទោសក្រោយបញ្ចេញសញ្ញាចង់ផ្ទេរទៅ Real Madrid
By Dany • 32 views
ខ្សែបម្រើ Enzo Fernandez របស់ Chelsea ត្រូវបានគេឃើញនៅទីក្រុង Madrid ប៉ុន្មានសប្តាហ៍ប៉ុណ្ណោះ បន្ទាប់ពីក្លិបបានដាក់វិធានការផ្តន្ទាទោសលើគាត់ ពាក់ព័ន្ធនឹងការបញ្ចេញសញ្ញាអំពីការចង់ផ្ទេរទៅ Real Madrid។
កីឡាករជម្រើសជាតិអាហ្សង់ទីនរូបនេះ ត្រូវបានថតរូបនៅទីក្រុងអេស្ប៉ាញ តិចជាង 24 ម៉ោងបន្ទាប់ពីការបង្ហាញសមត្ថភាពល្អក្នុងជ័យជម្នះ 1-0 របស់ Chelsea លើ Leeds United នៅវគ្គពាក់កណ្ដាលផ្តាច់ព្រ័ត្រ FA Cup។ ទោះមានភាពតានតឹងខ្លះនៅ Stamford Bridge ក៏ដោយ គាត់មើលទៅមិនមានការព្រួយបារម្ភឡើយ។
កីឡាករវ័យ 25 ឆ្នាំនេះ បានទៅទស្សនាការប្រកួតវាយកូនបាល់ Mutua Madrid Open ហើយក៏បានដើរលេងក្នុងទីក្រុងជាមួយមិត្តរួមក្រុម Marc Cucurella និង Joao Pedro ផងដែរ។ ការធ្វើដំណើរនេះកើតឡើងនៅពេលដ៏សំខាន់មួយ បន្ទាប់ពីគាត់ធ្លាប់បង្ហាញការចាប់អារម្មណ៍លើទីក្រុង Madrid ដែលធ្វើឲ្យមានការមិនពេញចិត្តពីថ្នាក់ដឹកនាំក្លិប។
នៅដើមខែមេសា Chelsea បានចាត់វិធានការរហ័ស បន្ទាប់ពី Fernandez បាននិយាយថា គាត់ចង់រស់នៅទីក្រុង Madrid ហើយពណ៌នាថា ជាទីក្រុងស្រស់ស្អាត ដូចជា Buenos Aires។ ពាក្យសម្តីនេះបាននាំឲ្យគាត់ត្រូវពិន័យផ្ទៃក្នុង ដោយផ្អាកចូលលេង 2 ប្រកួត ពេលជួប Manchester City ក្នុង Premier League និង Port Vale ក្នុង FA Cup។
បន្ទាប់ពីបញ្ចប់ការផ្អាក Fernandez បានជ្រើសរើសចំណាយពេលសម្រាកនៅទីក្រុង Madrid ដែលគាត់ធ្លាប់និយាយថាចង់រស់នៅទីនោះ។ ទោះបីដំណើរនេះមានការអនុញ្ញាតពីគ្រូបង្វឹកក៏ដោយ ប៉ុន្តែវាបានធ្វើឲ្យអនាគតរបស់គាត់ជាមួយ Chelsea ត្រូវបានពិភាក្សាឡើងវិញយ៉ាងខ្លាំង។
យ៉ាងណាក៏ដោយ នៅលើទីលាន Fernandez នៅតែជាកីឡាករសំខាន់។ គាត់បានស៊ុតបញ្ចូលទីនៅនាទី 23 ទល់នឹង Leeds និងទទួលបានពាន Man of the Match។ គ្រូបណ្តោះអាសន្ន Calum McFarlane ក៏បានសរសើរគាត់ថា ជាកីឡាករមានទេពកោសល្យខ្ពស់ និងមានចិត្តប្រយុទ្ធ ដែលមានតម្លៃយ៉ាងខ្លាំងសម្រាប់ក្រុម។
