Bayern Munich បង្កើនល្បឿនក្នុងការចរចាកុងត្រាថ្មីជាមួយ Harry Kane មុន World Cup

ក្លិប Bayern Munich កំពុងពន្លឿនការចរចាកុងត្រាថ្មីជាមួយខ្សែប្រយុទ្ធ Harry Kane ដោយមានគោលបំណងបញ្ចប់ឲ្យបានមុនការចាប់ផ្តើម World Cup នៅថ្ងៃទី១១ ខែមិថុនា។ ការផ្លាស់ប្តូរនេះត្រូវបានរាយការណ៍ថា ជាការពង្រឹងសំខាន់មួយសម្រាប់ក្លិប ដែលកំពុងឈានដល់វគ្គពាក់កណ្ដាលផ្តាច់ព្រ័ត្រ Champions League។

តាមព័ត៌មានពី Sky បានបញ្ជាក់ថា Bayern ទទួលបានសញ្ញាវិជ្ជមានពី Kane និងគ្រួសាររបស់គាត់ ដែលមានបងប្រុស Charlie និងឪពុក Pat ជាអ្នកតំណាង។ អតីត CEO របស់ក្លិប Karl-Heinz Rummenigge ក៏បានបញ្ជាក់ថា Bayern ចង់បន្តការងារជាមួយ Kane ជាយូរអង្វែង។

លោកបាននិយាយថា Kane មិនបានប្រើ clause ដើម្បីចាកចេញទេ ដែលបង្ហាញថាគាត់ចង់ស្នាក់នៅ Bayern ហើយក្លិបនឹងចាប់ផ្តើមចរចាផ្លូវការបន្ទាប់ពីបញ្ចប់រដូវកាលនេះ ដើម្បីបន្តកុងត្រា។

ខណៈពេលក្រុមធ្វើដំណើរទៅទីក្រុង Paris ដើម្បីប្រកួតជើងទី១ វគ្គពាក់កណ្ដាលផ្តាច់ព្រ័ត្រ Champions League ទល់ PSG នាយកកីឡា Max Eberl ក៏បានបញ្ជាក់ដូចគ្នា ថាក្លិបនឹងព្យាយាមរកដំណោះស្រាយជាមួយ Kane មុន World Cup។

Kane បានផ្ទេរពី Tottenham Hotspur មក Bayern នៅឆ្នាំ 2023 ក្នុងតម្លៃប្រមាណ €100 លាន ហើយបច្ចុប្បន្នគាត់រកបាន 138 គ្រាប់ក្នុង 141 ប្រកួត។ មិនត្រឹមតែជាអ្នកស៊ុតបញ្ចូលទីទេ គាត់ក៏បានក្លាយជាខ្សែប្រយុទ្ធបែប “playmaker” ក្រោមការដឹកនាំរបស់គ្រូ Vincent Kompany ដែលបង្ហាញពីសារៈសំខាន់របស់គាត់ក្នុងប្រព័ន្ធលេងរបស់ក្រុម។

កុងត្រារបស់ Kane នឹងបន្តរហូតដល់ឆ្នាំ 2027 ប៉ុន្តែបើមិនមានការបន្តថ្មីទេ គាត់អាចចរចាជាមួយក្លិបផ្សេងបានចាប់ពីខែមករាខាងមុខ។ ទោះយ៉ាងណា Kane បានបញ្ជាក់ថាគាត់មានអារម្មណ៍សប្បាយចិត្តនៅ Bayern ដែលធ្វើឲ្យការត្រលប់ទៅ Premier League ត្រឹមរយះពេលខ្លី មិនគួរអោយជឿ។

យ៉ាងណាក៏ដោយ ឱកាសត្រលប់ទៅលេងនៅអង់គ្លេសនៅថ្ងៃក្រោយ មិនទាន់ត្រូវបានបិទទ្វារទាំងស្រុងនោះទេ ព្រោះ Harry Kane នៅតែមានគោលដៅធំបំបែកកំណត់ត្រារកគ្រាប់បាល់ច្រើនបំផុតរបស់ Alan Shearer ដែលមាន 260 គ្រាប់ ខណៈរូបគេនៅខ្វះត្រឹមតែ 47 គ្រាប់ប៉ុណ្ណោះ។