Chicago Fire ដាក់សំណើផ្លូវការលើកដំបូង ចង់បាន Lewandowski ពី Barcelona ខណៈអនាគត Lewandowski នៅតែមិនទាន់ច្បាស់លាស់
By Dany • 9 views
អនាគតរបស់ខ្សែប្រយុទ្ធ Robert Lewandowski នៅ FC Barcelona នៅតែពោរពេញដោយភាពមិនច្បាស់លាស់ ខណៈមានក្លិបមួយបានដាក់សំណើផ្លូវការរួចហើយ ដែលធ្វើឲ្យមានសំណួរថា គាត់អាចនឹងចាកចេញពីក្លិបឬយ៉ាងណា។
តាមរបាយការណ៍ពី Sky Sport ប្រធានក្លិប Barcelona លោក Joan Laporta បានជួបពិភាក្សាជាមួយភ្នាក់ងាររបស់កីឡាករ គឺ Pini Zahavi ហើយក្លិបក៏បើកចំហក្នុងការបន្តកិច្ចសន្យារហូតដល់ឆ្នាំ 2027។
ទោះជាយ៉ាងណា ដើម្បីបន្តកិច្ចសន្យា Lewandowski ត្រូវព្រមព្រៀងកាត់បន្ថយប្រាក់ខែ ប៉ុន្តែទាំងពីរភាគីជឿថា អាចរកដំណោះស្រាយបាន។
នៅពេលដំណាលគ្នា ក្លិបក្នុង MLS គឺ Chicago Fire ត្រូវបានរាយការណ៍ថា បានដាក់សំណើដំបូងទៅកាន់ភ្នាក់ងាររបស់គាត់ ដើម្បីនាំយកខ្សែប្រយុទ្ធវ័យ 37 ឆ្នាំរូបនេះ ទៅលេងនៅសហរដ្ឋអាមេរិក បន្ទាប់ពីបញ្ចប់រដូវកាល។
មិនត្រឹមតែប៉ុណ្ណោះ ក្លិបនៅ Saudi Arabia និងអ៊ីតាលី ក៏នៅតែបង្ហាញចំណាប់អារម្មណ៍ផងដែរ ដោយមាន AC Milan និង Juventus ត្រូវបានភ្ជាប់ឈ្មោះជាមួយកីឡាកររូបនេះ។
សម្រាប់ Lewandowski គាត់មិនទាន់បញ្ជាក់អ្វីច្បាស់លាស់នៅឡើយទេ។ នៅដើមខែ មិនា គាត់បាននិយាយថា៖
“ខ្ញុំមិនទាន់ដឹងទេ ព្រោះខ្ញុំត្រូវមានអារម្មណ៍ច្បាស់លាស់ជាមុន។ ឥឡូវនេះខ្ញុំមិនទាន់ប្រាកដសូម្បីតែ 50% ទេថា ខ្ញុំនឹងជ្រើសរើសផ្លូវណា។”
ក្រោមការដឹកនាំរបស់គ្រូបង្វឹក Hansi Flick គាត់នៅតែទទួលបានឱកាសលេងជាញឹកញាប់ ទោះបីមានពេលខ្លះចាប់ផ្តើមពីកៅអីបម្រុងក៏ដោយ។
ក្នុងរដូវកាលនេះ គាត់រកបាន 17 គ្រាប់ និងបញ្ជូនបាន 3 ដង ក្នុងការប្រកួតសរុប 40 ប្រកួត (លេងជាង 2,000 នាទី) ដែលនៅតែជាស្ថិតិល្អសម្រាប់កីឡាករវ័យនេះ។
