ក្រុមហ៊ុន F5 ព្រមានថា ការបែកធ្លាយព័ត៌មានដែលធ្វើឱ្យរដ្ឋាភិបាលព្រួយបារម្ភ
By Sameth • 229 views
ក្រុមហ៊ុន F5 ព្រមានថា ការបែកធ្លាយព័ត៌មានដែលធ្វើឱ្យរដ្ឋាភិបាលព្រួយបារម្ភ នឹងប៉ះពាល់ដល់ការលក់ ហើយភាគហ៊ុនបានធ្លាក់ចុះ
ថ្ងៃទី ២៧ ខែ តុលា ហ៊ុនសន្តិសុខតាមប្រព័ន្ធអ៊ីនធឺណិត F5 បានព្យាករណ៍ប្រាក់ចំណូលប្រចាំឆ្នាំទាបជាងការប៉ាន់ស្មានរបស់ទីផ្សារមូលបត្រ Wall Street កាលពីថ្ងៃចន្ទ ដោយព្រមានថា ការបែកធ្លាយប្រព័ន្ធថ្មីៗនេះ ដែលបានបង្កឱ្យមានការភ្ញាក់ផ្អើលចំពោះហានិភ័យដែលអាចកើតមានចំពោះប្រព័ន្ធរដ្ឋាភិបាលសហរដ្ឋអាមេរិក និងចក្រភពអង់គ្លេស នឹងធ្វើឱ្យប៉ះពាល់ដល់តម្រូវការសម្រាប់សេវាកម្មរបស់ខ្លួន។
ភាគហ៊ុនរបស់ក្រុមហ៊ុននេះ ដែលបម្រើសេវាកម្មដល់ក្រុមហ៊ុនធំៗភាគច្រើននៅក្នុងបញ្ជី Fortune 500 បានធ្លាក់ចុះ ៥,៨% នៅក្នុងការជួញដូរបន្ទាប់ពីម៉ោងធ្វើការ។
ក្រុមហ៊ុន F5 បានលាតត្រដាងកាលពីដើមខែនេះថា ពួក Hacker បាន "ចូលប្រើប្រាស់រយៈពេលវែង និងបន្ត" ទៅក្នុងប្រព័ន្ធមួយចំនួនរបស់ក្រុមហ៊ុន រួមទាំងប្រភពកូដ (source code) សម្រាប់សេវាកម្មសន្តិសុខតាមប្រព័ន្ធអ៊ីនធឺណិតដ៏សំខាន់មួយរបស់ខ្លួន។ ក្រោយមកទីភ្នាក់ងារសារព័ត៌មានរ៉យទ័របានរាយការណ៍ថា អ្នកដែលដឹងពីការស៊ើបអង្កេតនេះ បានសន្មតថាការបែកធ្លាយនេះគឺបណ្ដាលមកពីពួក Hacker ដែលមានការគាំទ្រពីរដ្ឋាភិបាលនៃប្រទេសចិន។
មន្ត្រីសហរដ្ឋអាមេរិកបាននិយាយថា បណ្ដាញសហព័ន្ធគឺជាគោលដៅមួយក្នុងចំណោមគោលដៅដែលត្រូវបានវាយប្រហារបន្ទាប់ពីការលួចចូល ហើយពួកគេបានជំរុញឱ្យមានសកម្មភាពជាបន្ទាន់។
ក្រុមហ៊ុន F5 បាននិយាយកាលពីថ្ងៃចន្ទថា៖ «F5 រំពឹងថានឹងមានការរំខានរយៈពេលខ្លីចំពោះវដ្តនៃការលក់ ដោយសារអតិថិជនផ្តោតលើការវាយតម្លៃ និងការកែសម្រួលបរិស្ថានរបស់ពួកគេ បន្ទាប់ពីឧបទ្ទវហេតុសន្តិសុខថ្មីៗនេះ»។
នាយកប្រតិបត្តិបាននិយាយនៅក្នុងសន្និសីទបន្ទាប់ពីការចេញផ្សាយប្រាក់ចំណូលថា ក្រុមហ៊ុនមិនទាន់ឃើញមានផលប៉ះពាល់ដល់តម្រូវការណាមួយនៅឡើយទេ។
លោក Francois Locoh-Donou នាយកប្រតិបត្តិ បាននិយាយនៅក្នុងសន្និសីទនោះថា ឧបទ្ទវហេតុនេះបានប៉ះពាល់ដល់អតិថិជន BIG-IP តាមរបៀបសំខាន់ពីរ។ ទីមួយ គឺអតិថិជនមួយចំនួនត្រូវតែធ្វើបច្ចុប្បន្នភាពយ៉ាងឆាប់រហ័សទៅការចេញផ្សាយចុងក្រោយបំផុត បន្ទាប់ពីការលាតត្រដាងពីឧបទ្ទវហេតុនេះ។
ទីពីរ គឺអតិថិជនមួយក្រុមតូចដែលបានប្រឈមមុខនឹងការលួចទិន្នន័យមានកម្រិត ហើយត្រូវបានជូនដំណឹងជាមួយនឹងព័ត៌មានលម្អិត។ លោក Locoh-Donou បាននិយាយថា មតិប្រតិកម្មដំបូងបានបង្ហាញថា ទិន្នន័យនេះមិនមែនជាទិន្នន័យរសើបទេ។
ក្រុមហ៊ុន F5 បានព្យាករណ៍ថា កំណើនប្រាក់ចំណូលពេញមួយឆ្នាំនឹងមានចន្លោះពី ០% ទៅ ៤% ដោយរំពឹងថាផលប៉ះពាល់នៃតម្រូវការនឹងមានសភាពខ្លាំងក្លាជាងនៅឆមាសទីមួយ មុនពេលវិលទៅរកភាពធម្មតានៅឆមាសទីពីរនៃឆ្នាំសារពើពន្ធ ២០២៦។ តួលេខនេះគឺទាបជាងការប៉ាន់ស្មានជាមធ្យមរបស់អ្នកវិភាគដែលរំពឹងថានឹងមានការកើនឡើង ៤,៨% នេះបើយោងតាមទិន្នន័យដែលចងក្រងដោយ LSEG។
ក្រុមហ៊ុនបានព្យាករណ៍ប្រាក់ចំណូលត្រីមាសទីមួយចន្លោះពី ៧៣០ លានដុល្លារ ទៅ ៧៨០ លានដុល្លារ ដោយរាប់បញ្ចូលទាំងការរំខានដែលអាចកើតមានពីការបិទរដ្ឋាភិបាលសហរដ្ឋអាមេរិក។ តួលេខនេះក៏ទាបជាងការប៉ាន់ស្មានចំនួន ៧៩១ លានដុល្លារ ផងដែរ។
